ARQUITECTURA DOMÉSTICA POPULAR:
O casarío que conforma o casco urbano está formado por unha arquitectura sinxela de dimensións exiguas en planta cun crecemento en altura peculiar e propio de Rinlo. En Rinlo non atopamos a casa mariñeira dunha planta con soportal e patín típica da zona das Rías Baixas. Rinlo é un núcleo compacto e pechado de costas ó mar, as traseiras forman unha fachada marítima continua puntualmente perforada por ocos mínimos que outean o mar. Sobre esta base levántase arbitrariamente unha amálgama de chemineas, paredóns e lousados de diferentes formas e inclinacións formando un orixinal conxunto de xeometría caprichosa que dentro da súa desorde acada un valor escultórico. A fábrica común do casco urbano compleméntase con magníficos exemplos de edificios singulares como dúas casonas indianas de gran porte, un pavillón modernista, exemplos de arquitectura racionalista dos anos cincuenta, exemplos dos primeiros chalés funcionalistas dos anos setenta, e edificios públicos como a igrexa parroquial e a escola, todo salpicado con construcións adxectivas de uso agrícola como horros e palleiras.
(…)
